Ástu upp!

Mér finnst svo sjálfsagt og eðlilegt að hún Ásta Ragnheiður lendi ofarlega á lista. Að mínu mati er 3. sætið algjört lágmark. Hún er ein af fáum stjórnmálamönnum sem hefur langan afrekalista að mínu mati. Ef við berum saman Ástu, Helga Hjörvar, Skúla Helgason, Össur og Steinunni Valdísi þá er þetta nú borðleggjandi, ha? Ég þekki reyndar ekkert til Skúla Helgasonar en hin eiga bara ekki erindi samanborið við Ástu.

Ég ætla alla vega að leggja mitt af mörkum til að Ásta lendi ofar en þau hin þannig að hún geti haldið áfram að gera góða hluti í þágu okkar hinna. Nú er ég engin sérstök Samfylkingarmanneskja en mér finnst Ásta virkilega leggja sig fram í sínu starfi og það verður til þess að ég vil endilega að hún fái tækifæri til að halda því áfram. Ég get aftur á móti ekki sagt um þau hin að þau leggi sig virkilega fram í sínu starfi. Þá er ég ekki að segja að þau vinni sín störf ekki vel, ég hef bara ekki séð það til þeirra

Áfram Ásta Ragnheiður

Ásta sækist eftir 3. sætinu

Multitasking...

...tekið alla leið

Ók bíl, gaf barni brjóst og talaði í síma á meðan

K-B-ónus

Látið orðið berast. Fyrstu þrír dagar vikunnar eru einu dagarnir sem maður á að láta sjá sig með veskið í verslunum Bónuss og Krónunnar en þar hækkar vöruverð hina dagana Og þar hafið þið það. Versla í matinn á mánudegi, þriðjudegi eða miðvikudegi.

Öskudagur til mæðu

Það er komið að því. Næsti Öskudagur nálgast óðfluga. Dagurinn sem ég kvíði yfirleitt. Af hverju? Jú, ég er útivinnandi og hef ekki tök á því að þeysast á milli fyrirtækja með börnin mín grímuklædd í aftursætinu svo þau geti sníkt sælgæti í fyrirtækjum. Mér finnst það reyndar alveg glataður nýr siður en hverju tekur maður nú ekki þátt í með ormunum sínum?  (Hef reyndar aldrei gert það, þeir hafa alltaf verið í Frístundaheimilinu þennan dag )

Málið er, að í þeirra skóla er alltaf starfsdagur á Öskudag. Foreldrafélagið hefur séð um hátíð sem fram fer í íþróttasal skólans og byrjar hún yfirleitt í kringum kl 14 og stendur í tvo tíma ca. Þannig að fram að því eru strákarnir mínir einir heima þar sem báðir eru hættir í Frístundaheimilinu, grímuklæddir að bíða eftir því að hátíðin hefjist af því mamma gamla er í vinnunni, grímuklædd með hinum börnunum sínum að slá köttinn úr tunnunni og kemst því ekki til að skutlast í nammisníkjuferðirnar

Í ofanálag á miðsonurinn afmæli þennan dag.

 

Hvað með það?

Æji kommon.

Hvað kemur fólki við þó forsætisráðherrann sé samkynhneigður? Vitum við fyrir víst hvort þetta sé fyrsti samkynhneigði forsætisráðherrann? Við höfum ekki hugmynd um það enda kemur það okkur ekki við.

Hvað vitum við um það hvort Geir Haarde eða Davíð Oddsson séu bullandi sadómasó og á kafi í BDSM?

Ekki það að ég sé að leggja að jöfnu samkynhneigð og það sem ég kalla afbrigðilegt kynlíf heldur er ég reyna að undirstrika hvað mér finnst fáránlegt að finnast það koma okkur við hvað fólk gerir í sínu einkalífi og í svefnherberginu. Ég get ekki ímyndað mér að það hafi áhrif á störf Jóhönnu Sigurðardóttur þó maki hennar sé kvenmaður. Ekki frekar en að ég geti ímyndað mér að það hafi áhrif á störf Davíðs Oddssonar að maki hans sé kvenmaður. Eða hvort hann saumi út í frístundum eða sé meðlimur í Þjóðdansafélaginu.

En svo komum við að því að manneskjan er í eðli sínu forvitin. Sér í lagi forvitin um persónulega hagi samborgara sinna. Það er bara verst þegar forvitnin hefur neikvæðar afleiðingar fyrir viðkomandi. Eins og ég get ímyndað mér fyrir Jóhönnu sem komið hefur fram í fjölmiðlum að sé mjög prívat manneskja.

Og lái henni það hver sem vill.

Jóhanna vekur heimsathygli

Hvað er að fólki?

Ég er reið. Ég er reið yfir þjóðfélagsástandinu. Ég er reið yfir því að yfirvöld brugðust okkur með því að bregðast ekki rétt við ástandinu, enginn virðist tilbúinn að viðurkenna ábyrgð sína. Fólk í þeim ábyrgðarstöðum sem átti að koma í veg fyrir að hrunið yrði eins slæmt og raun ber vitni er enn í þeim ábyrgðarstöðum og hefur hreinlega komið fram með hroka í fjölmiðlum.

Ég er fylgjandi mótmælum. Þeim mega fylgja læti að mínu mati. En ekki ofbeldi eða skemmdarverk. Reiðin á ekki að beinast að lögreglumönnum sem eru að sinna sínu starfi eflaust margir hverjir jafn reiðir og við hin vegna ástandsins í þjóðfélaginu. Það er líka búið að skuldsetja þá og þeirra fjölskyldur upp í topp rétt eins og okkar.

En nú tekur steininn úr. Hvað er hægt að segja um fólk sem ekki getur fundið til samkenndar með samborgurum sínum? Forsætisráðherra greinir frá því í fjölmiðlum að hann sé alvarlega veikur og fólki eins og Herði Torfa dettur virkilega í hug að láta út úr sér að það sé pólitískt útspil! Haft er eftir einhverri Guðrúnu Tryggvadóttur að hún telji Geir heppinn að hafa veikst, því nú muni fólk ekki þjarma að honum! Hmmmm, af tvennu illu hvort ætli Geir myndi velja? Illkynja æxli eða að fólk "þjarmi að honum"? Mér finnst nú að sumir ættu virkilega að skammast sín.

Burtséð frá reiði minni yfir viðbrögðum ráðamanna við ástandinu finn ég innilega til með Geir Haarde, Ingibjörgu Sólrúnu Gísladóttur og þeirra fjölskyldum og ég óska þeim alls hins besta í sinni baráttu. Mér finnst að við íslendingar eigum að sýna þá samstöðu sem marg hefur verið umrædd og senda þeim hlýja strauma og kveðjur og hafa þau í bænum okkar.

„Ekki farin að finna til með honum ennþá“

Kurt Nilsen og co

Verð að deila einu með ykkur. Raggi fékk geisladisk í afmælisgjöf frá systur minni og hennar manni. Hvorki meira né minna en sér-innfluttur fyrir Ragga  Þetta mun vera diskur sem ekki fæst hér á landi en með tónlist sem við hjónin höfum fengið að njóta heima hjá fyrrnefndri systur minni  Á diskinum syngja saman á tónleikum fjórir norskir gaurar og þeirra á meðal fyrir þá sem til þekkja er Kurt Nilsen (með frekjuskarðið), sá er vann alheims-Idolkeppnina um árið. Nema hvað, að við erum búin að brenna tvö eintök, eitt í hvorn bíl þannig að þá er orginalinn klár í græjunum heima og þannig getum við gólað okkur hás í bílunum báðum. Ef ég væri á góðærisbankastjóralaunum fengi ég ekki Elton John til að koma og spila í afmælinu mínu. Ég fengi þessa fínu norðmenn. Og hananú.

Ég fann eitt gott tóndæmi á youtube og ákvað sem sagt að deila því með ykkur:

http://www.youtube.com/watch?v=MPl01GRU2Zw

 

Tortelímí...

... var svarað með festu þegar ég spurði Birki hvað hefði verið í matinn í skólanum í gær. Hmmmm, ætli það sé svona svolítið ofsoðið pasta?

Nú er rétt að komast á einhver regla á heimilinu eftir jólin, svefninn við það að komast aftur í sama vanann en ansi hafa skrefin verið þung fram úr rúminu undanfarna morgna maður minn. Þetta er auðvitað afleiðing þess að maður lá á meltunni í tæpar tvær vikur og sneri sólarhringnum við. Með lengri jólafríum en hefði að sjálfsögðu ekki viljað hafa það styttra þó erfitt sé að koma jafnvægi á liðið eftir herlegheitin.

Raunveruleg áhrif kreppunnar eru aðeins farin að gera vart við sig. Maður finnur hvernig róðurinn er tekinn að þyngjast í vinnunni, ekki má ráða nýtt starfsfólk og yfirvinna á að vera í lágmarki. Álagið er því að aukast þar og er þetta þó vinna sem fylgir mikið álag svona dags daglega. Nú vofir atvinnuleysið yfir þeim samstarfsfélögum Ragga sem sagt var upp störfum sökum samdráttar hjá fyrirtækinu og maður finnur auðvitað innilega til með því fólki og þeirra fjölskyldum.

Svo er það auðvitað fjölskyldan okkar á Vatnsendablettinum sem maður er alltaf að senda hlýja strauma til. Vona bara að það hafi eitthvað að segja þó það dugi skammt.

Ég er alltaf að gefa mér það að ALLIR hugsi eins og ég og haldi nú alveg að sér höndum og setji kortið í frystinn en svo er manni litið á fréttirnar þegar verið er að ræða útsölur og á þeim er fjöldinn allur af fólki að gera góð kaup. Endalaust gott mál að svo margir séu í það góðum málum, ég þori bara ekki að hreyfa veskið mitt  er svo viss um að ástandið eigi eftir að versna ennþá meira og vil því halda fast í hverja krónu.

Dettur mér í því sambandi í hug gullmoli sem kom frá e-u leikskólabarninu; barnið var að koma úr leikskólanum og mamman segir að þau þurfi aðeins að skreppa í Krónuna og versla. Þá segir barnið: En mamma það er ekki hægt, Krónan er hrunin!!

Gleðilegt nýtt ár alle i hoppa

Aðfangadagur jóla

Þá er aðfangadagur loksins runninn upp og spennan á þessu heimili er að nálgast sama suðupunkt og hangiketið í pottinum  Fjölskyldan var að skreyta tréð og pakka inn gjöfum fram á nótt og nú eru feðgarnir farnir á flakk að dreifa pökkum. Hér sit ég eins og haugur og er að manna mig upp í að kikka á læknavaktina og biðja einhvern viti borinn þar að hlusta kellu. Ég hefði nefnilega svo gjarnan viljað fara með feðgunum í pakkabíltúrinn þar sem þeir voru líka að fara að heimsækja nýjasta fjölskyldumeðliminn, bróðurson Ragga sem fæddist í fyrradag  En, maður leikur sér ekki að því að flytja pestir inn á heimili hvítvoðunga þannig að hér sit ég og vorkenni sjálfri mér

Mér er svo sem engin vorkunn það er ekki það. Hjartað fyllist sjálfkrafa af gleði á aðfangadag, um leið og ilmurinn af ketinu í pottinum berst um íbúðina eru jólin bara komin hjá mér.

Birkir kom með þessa fínu hugmynd í síðustu viku; "Mamma, ég veit. Eigum við að vera í búningum á jólunum?" Hmmmmm, leyfðu mér að hugsa..... Neeei, ég held bara ekki svei mér þá. "Jú, við eigum svo mikið af búningum, ég get verið í vampírubúningnum mínum!" Já, nei ég lét ekki alveg sannfærast. Þarna vorum við nefnilega búin að vera að máta sparifötin og fara yfir hvað væri orðið of lítið og solleis. Þjóðfélagsástandið hefur ekki alveg farið fram hjá þeim bræðrum og sú umræða á heimilinu að nú þurfum við bara að passa peningana okkar alveg sérlega vel. Hann lét okkur pabba sinn vita í síðasta mánuði að við þyrftum ekkert að vera að kaupa neitt dót handa þeim bræðrum. Þegar við hváðum var svarið að jú, við þyrftum að spara peningana okkar... Það er ekki laust við að við foreldrarnir höfum hugsað á þeim tímapunkti að kannski værum við aðeins of mikið að tala um peninga og vandamál sem þeim getur fylgt við börn sem eiga rétt á að fá að vera áhyggjulaus. En kannski var vampírubúningurinn líka leið til að fría foreldrana frá því að leggja í sparifatakaup. Eða kannski bara leið til að losna við að vera í sparifötunum

Birkir á það til að fá svona fínar hugmyndir. Í gær var hann til dæmis búinn að finna nafn á nýfæddan frænda sinn: Sigmar. "Sigmar Sigvaldason pabbi, það hljómar vel er það ekki?" Eeeee, jújú, hva þekkir þú einhvern Sigmar? "Neinei, mér finnst þetta bara fínt nafn!".

Yngri bróðir hans kom líka með skemmtilegt gullkorn í síðustu viku. Sá var búinn að vera að dunda sér inni í herbergi og sá eldri var alltaf að koma inn og pota eitthvað í hann. Endaði með því að sá yngri fyrtist við og hvæsti á þann eldri: "Birkir, gæti ég fengið að vera til friðs??!!"

Ójá, Mikael minn þú gætir það alveg. Það tekst bara ekki alltaf hjá þér elsku kallinn minn

Ég óska ykkur öllum gleðilegra jóla og farsældar á nýju ári

Jólaávaxtakaka :)

Hún Jóga vinkona mín sendi mér þessa líka fínu uppskrift af jólaköku um daginn. Datt í hug að deila henni með ykkur. Hún er mjög góð.  Þ.e.a.s. uppskriftin

 

 

Hér er jólauppskriftin mín:

1 bolli vatn
1 bolli sykur
4 stór egg
2 bollar þurrkaðir ávextir
1 teskeið bökunarsódi
1 teskeið salt
1 bolli púðursykur
1 bolli sítrónusafi
1 bolli hnetur
1 FULL flaska af Grand

Smakkið Grandið til að vera viss um að það sé ekki skemmt.
Takið stóra skál.
Athugið Grandið aftur til að vera alveg viss um að það sé ekki skemmt.
Hellið í einn bolla og drekkið. Endurtakið.
Kveikið á hrærivélinni, hrærið 1 bolla af smjöri í stóra, mjúka skál.
Bætið 1 teskeið útí og hrærið aftur.
Athugið hvort Grandið sé nokkuð farið að skemmast, fáið ykkur annan bolla.
Slökkvið á hrærivélinni.
Brjótið tvær fætur og bætið í skálina og hendið út í bollanum af þurrkuðu
ávöxtunum. Hrærið á kveikivélinni.
Ef þurrkuðu ávextirnir festast við hrærararrarna losið þá þá af með
rúfskjárni.
Bragðið á Grandinu til að athuga brestgratið.
Næst, sigtið 2 bolla af salti. Eða einhverju. Hverjum er ekki sama.
Athugið Grandið. Sigtið sítrónusafann og teygið hneturnar. Obb, obb, obb.
Bætið einu borði. Skeið. Af sykri eða ikkað. Hvað sem þú finnur nálægt.
Smyrjið ofninn.
Stillið kökuformið á 250°.
Gleymið ekki að hræra í stillaranum.
Hendið skálinni út um gluggann.
Athugið Grandið aftur. Farið að sofa.

(Finnst ykkur ávaxtakökur hvort sem er nokkuð góðar?)